قصة بنت تخرجت من الثانوية

بسم الله الرحمن الرحيم

تخرجت من الثانوية مثلي مثل اي شاب عنده طموح
يتخرج من الجامعه
ويتوظف في الحكومه ومن يوم الثانوي ما اعرف امريكا الا على الخريطه
أبوي وأمي ما يعرفون غير مكه المدينه جده والقصيم والوالد مثقف يعرف إمريكا وأوربا قريتنا صغيره مره في احظان الصحراء المهم ابي اكمل الدراسه وحبيت راس الوالد قلتله ابي اكمل
دراستي في الرياض واللي هو يلتفت على ويقول وشو هاه قلت لا ابد سلامتك
قال اسمع ياوليدي خلك مثل ولد جيرانا يشتغل
في البلديه معطينه سيارة
قلت يبه انا ودي اصير مدير يبه ودي اتعلم بعد الوالد صكت براسه مدير قال اها طيب وين تبي تدرس فيه قلت الرياض قال يعني ما تجي الاداره الا بالرياض قلت
يبه ديرتنا والديره اللي ادرس فيها يبه ما فيها جامعه
قال يا وليدي الله يوفقك والدنيا ضحكتلي خلاص بروح الرياض اللي نسمع
عنها وطيران على بيت الجيران عشان اتفق مع ولدهم نروح الرياض
ويوم وصلنا الرياض تعال شوف التوهان ويالله بعد فزعات من خلق الله وصلنا جامعت الملك سعود بالملز
اول مادخلنا على التسجيل وشافو الدرجات وجاك اللي ناصح لي يبيني اتعلم
افضل تعليم الله يذكره بالخير الاستاذ عبدالله الفهد قال ياوليدي ورا ما تروح لوزارة المعارف ترى عندهم بعثات لامريكا هو قال امريكا دارت بي الدنيا قلت وشو قال بيبعثونك تدرس على حساب الحكومه هناك قلت وش ادرس قال انت درجاتك زينه تدرس هندسه اي شي تدرسه ذا كلامه بالحرف قلت طيب
وشلون ابوي قال ها لازم موافقته قلت وش اسوي طيب قال رح لافلان بالوزاره وتعرف كل شي
ويوم طلعنا قال ولد الجيران اي امريكا واي خرابيط والله لو يعرف ابوك وشي امريكا كان مردغك((يعني يضربك)) الين تقول امين ابوك مايعرف امريكا يعرف انها ديرة الكفار قلت خلنا نروح نشوف
وش عندهم ويصير خير انطلقنا لوزارة المعارف بعد ما قابلنا الرجال وهو يوصف لنا المكان وجينا الوزاره وهم يعطونا ذيك الاوراق ويقولون خل ابوك يوقع قلت ايه هين يوقع يبي يوقع على جبهتي قال ولد الجيران اخلص تبي الجامعه او خلني ارجع لاهلي قبل الليل انا صراحه خمتني فكرة امريكا قلت في نفسي
الموت واحد بروح لبوي واللي يسوي يسيويه و ولد الجيران يقنع فيني وانا بعالم ثاني المهم قال بكيفك خلنا نتغدا وبعدين نمسك الخط نرجع تغدينا وانا ما اكلت شي بس ألمس الكبسه لمس وصلت امريكا الف مره ولد الجيران طايح في الاكل ركبنا السيارة راجعين لديرتنا وانا افكر في ابوي شويه وافكركيف افاتحه
بالموضوع وامي وش بتقول واخواني الصغار وأخواتي المهم ولد الجيران يسولف على وانا بعالم ثاني ما توقعت اني بجيني هل الحاله قلت خل اشوف هل الاخ يمكن
يطلعلي بفكره تساعدني قلت وش رايك انا رايح رايح لامريكا بس ابي
طريقه اقول لبوي فيها ضحك ذيك الضحكه اللي هبلتني زود قال حبيبي انس
الموضوع ابوك ما هوب راضي قلت اسمع انا رايح رايح بس فكني اما تساعدني
او لاتعلم احد شافني جاد قال مالك الا تقوله انك شافوك الجامعه ولد متربي واخلاق ممتازه وقالو منهو ابوك هللي طلع هل الرجال نبيك تروح تدرس برا على حساب الحكومه وانهم يبي يعطونك بيت وايعطونك اكل ويراقبونك لين تخلص من الدراسه واذا خلصت من الدراسه يجيبونك مديرالصحيه
((يعني المستشفى))
ويعطونك راتب 10000عشرة الاف
هي سنة وحده
قلت أول مره تجيب علم طيب ولا تزعل انت ما دهورك
إلا عمال البلديه المهم وصلنا قريتنا على المغرب وكني رايح عن اهلي سنه امي تحظني واخواني يرقصون وخواتي يقولن اخوي خلاص متمدن
((يعني راح للعز للرياض))قلت ايه هين هذا اوله اجل اذا غبت سنه وش يبون يسوون سكت لين جا الوالد من عند الجيران باليل وانا انتظره حبيت راسه وقلت له يبه ابيك
بعلم شوي بس الوالد قال حبت هل الراس وراه بلا((يعني مصيبه)) قلت لا يبه
انا بقولك السالفه كلها قال طيب اها وش عندك قلت يبه الحكومه الله يعزها يبون يدرسوني برا على حسابهم ويمشون لي راتب الوالد ما استوعب قال انت وش تقول اضبط روحك وتكلم زين قلت يبه اسمعني لين اقولك خلاص
قال يالله اخلص قلت اللي صار كله قال ياوليدي من اصبح افلح وانا حسيت في بوادر موافقة مع ضيقت صدر لبوي المهم طول الليل وانا ادعي ربي وكل شوي مصلي لي ركعتين ولين جاء الفجر قمت اصلي مع الوالد واخواني وانا مانمت قال الوالد يوم طلعنا من الصلاة تعال خلنا برا وعلمني عدت عليه
السالفه كلها قال طيب ياوليدي متى ترجع قلت يبه اذا خلصت الدراسه اجيكم طاير قال يعني بالصيف قلت ايه المهم قال يا وليد امنتك اللي مايخون الامانه امنتك الله رح ياوليدي انا من الفرحه الدمعه على الخد وحسيت قلبي يرقع في صدري من الفرحه وجبت له الاوراق وبصم عليها وطيران انا وهو لولد الجيران على شان يوديني الرياض ومرت الأيام اللي جلستها في قريتنا الحالمة وبعد ثمانية أيام جلست مع الوالد
ولا حضت انه
متضايق قلت يبه سلامات وش فيك قال يا وليدي والله آنا خايف من هل الروحة أخاف
تروح ولا ترجع قلت يا يبه المكتوب ما عنه مهروب ان كان الله كاتب ارجع رجعت
وان كان مقدرلي غير كذا فالله وما اراد
قبل السفر للرياض وبعد اخذ أموافقه وتوقيع أبوى على الأوراق اتفقت مع ولد
الجيران انه يكون موعد سفرنا الفجر بعد الصلاة لملمت أغراضي وآنا سهران ما نمت أحس في أمي ما نامت وبعد ما خلصت سويت نفسي نايم وأذن الفجر وقمت وحصلت أخواني
وأخواتي ما ناموا كلهم بي يودعوني صليت ورجعت مع الوالد وجاء ولد الجيران ودعت أخواني وهم يبكون والوالدة مثلهم وقبلت راس الوالد والوالدة وحضنت أخواني كلهم ومشيت للرياض ودعت القريه وطول الطريق و ولد الجيران ينصحني أنى ما أضيع مع البنات ولا أضيع مجهود دراستي على الفاضي وصلنا الوزارة خلصت أوراقي على طول وموعد السفر بعد يومن اضطر ولد الجيران يجلس معاي وصلني للمطار وطبعا غشيم عمر رجلي ما ركبت طيارة ولا ادري كيف اسوي أي شي المهم بعد اللخبطة ركبت الطيارة والطيارة تنزل بلندن طبعا أول ما شفت المضيفة
حسيت اني عايش بعالم ثاني
لا وتكلمني بأدب سرت بي رعشت خوف من المجهول وطول الرحلة وأنا سرحان وبجنبي رجال شايب
يبي يسولف وانا الله اعلم بحالي حاجه وحده استفدها منه بمطار هيثرو بلندن علمني
وين أروح وين اجي
جلست خمس ساعات بالمطار وانا ما غمضت عيوني من البلاوي اللي شفت بنات عالم ويني وين القريه اللي عمري ما شفت فيها الا الجيران وبس والله اعلم بحالهم بعد
صحيح فيهم حلاوه لاكن ما طلعت لبرا ولا تعرف المكياج ولا غيره المهم طارت
الطياره لمطار نيورك
وتعال يا نييورك سكنتني السفاره مع عائله عشان الانجليزي وحصلت لي واحد سعودي
طار يوم شافني من الفرحه يقول اخيرا واحد من ريحة الاهل السعوديه تعرفنا على
بعض طبعا هو قبلي ويعرف المنطقه اكثر مني
وقالي يالله مشينا سينما انا ما ادري وشي وقعد يشرحها لي انا قلتله عيني ما
ذاقت النوم خليني انام
والصباح رباح طبعا العمه
(العمه اللي هي ام العائله اللي انا عندها)
تبتسم وتوريني وين مكاني وغرفتي وتوريني البيت وانا امشي زي الاهبل وراها بس ابي ارتاح افصخ هل البنطلون اللي عمري ما لبسته
دخلت الغرفه ورحت بسابع نومه الين بكره الصباح ومرت الايام وصاحبنا ما فيه شي
الا عرفته منه وبعدين دراستي صارت في سان فرانسسكو في بلد على البحيرة اسمه سكرمنتو بلد بس
روعه رحت وحسيت بغربه من جديد والاهل اشتقت لهم كثير بس اللي رادني عنهم كلمت
رجال لو رجعت ايش بي بيقولون عني كملت اجراآت تسجيلي ودخلت القاعة واول ما شفت وطاحت عيني عليه هذيك البنت اللي لابسه غيرهم محتشمه
طالعت فيني وصديت حظرت المحاظره الأولى وما ادري ليه فيه إحساس يشدني لها ولا عندي الجرأة أكلمها جمعت فلوسي واشتريت بيت وكنى شاري أمريكا كلها تعرفت على طلاب سعوديين كثير والبنت هذي بس
كل يوم أشوفها ولا حاولت اقرب يمها
يوم من الأيام يوم جمعه طبعا الصلاة محاضراتنا بعد الصلاة
نسيت أقولكم اني شريت سيارة نيسان صغيره وطبعا الشباب ما قصرو بالرخصة ضحكو على الامريكان ضحك بالرخصه يترجمون لي ويجاوبون عني المهم بعد الصلاة وقفت
سيارتي بالمواقف ودخلت للجامعه وكنت
بدري يوم دخلت ابي اخذ شاهي الا الاقي البنت طبعا ارتبكت وبدون شعور قلت سلام عليكم وانا
ما ادري وش جنسيتها امريكيه أي شي تفاجئت الصوت يرد يقول عليكم السلام لاحظت
ارتباكي وضحكت علي
وعشان تشيل الارتباك ولا اسبب لها إحراج قالت انت من وين قلت من السعوديه وانتي
قالت من السعوديه
وما دريت عن نفسي وانا واقف الا هي انحرجت وقالت تفضل اجلس انا صحيت لنفسي وقلت لا شكرا انا باخذ شاي واطلع قلت مع السلامه سلام ورحت واخذت الشاي ومن الهبال او الفرحه او ما ادري شسميه نيست السكر طلعت برا وشربت الشاي وقررت اجلس
جمبها وجيت للمكان اللي متعودة تجلس فيه وجلست جمبه ولا طالعت للباب اخاف تجي عيني بعينها ويوم الله اراد جت وجلست بمكانها وانا
حسيت فيها من دخلت الباب
جلست ولاحتى التفت عليها ما ادري ليه خوف او أي شي ما ادري المهم انا جالس
اتابع الدكتور واسجل كل شي يقوله كل العاده اثرها تسرق النظر يمي وتشوفني ايش اسوي يوم خلصت المحاظره التفت عليها
إلا عيني بعينها قلت هلا وهي قال مرحبا
قالت ماشاء الله عليك منت زيهم قلت انا مين قالت الشباب الثانين
انت حريص انا ما ادري طلعت مني كذا قلت ما تغربت وتركت اهلي الا انا ابي ارفع
راسي فوق وقبل كل شي ابوي ارفع راسه قدام العالم اني فعلا قدر تربيته قالت انت
من وين في السعوديه قلت لها انا من قريه فيها ما هي على الخريطه ضحكت من قلبها علي وانا ضحكت لضحكتها وقمت واقف وهي قامت قلت لها واحنا نمشي انتي من وين قالت
من الرياض ومشنا نسولف ما دريت الا حنا بالمواقف وانا امشي معها
تعديت سيارتي ويوم شفت سيرتها قلت هيه هيه ماشاء الله عليك سياره غاليه قالت ايه الوالد شراها لي قبل يرجع للسعوديه قلت ابوك كان هنا قالت ايه كان هنا لين اشترالي
بيت واطمئن علي وجهزلي كل شي قلت انتي شكلكم اغنياء قالت الحمد لله وبزود بعد اغنياء قلت لها الله يوفقنا
وايكم واستئذنت انا ورحت لسيارتي
وانا امشي اشوفها بمراية السيارة قلت في نفسي هل البنت وش تبي لاحقتني وامشي قلت يمكن بتشوف سيارتي وين ساكن انا وصلت لحد البيت والا هي وراي وقفت عند البيت اانا وقفت
من الدهشه ولا تحركت شفتها تنزل وتدخل لبيت طبعا هي ما تعرف سيارتي ويوم جاء
بكره الصباح حرصت انها تشوفني تعرف اني جارها وجلست في السياره اشغلها لين طلعت نزلت من سيارتي وانا اكحكح عشان تشوف وانا ما التفت لها ودخلت وجبت جكيتي وركبت ولا كني اطالعها ومشيت وهي احسها تناظرني ودخلت المواقف ورحت للقاعه وجلست بمكان قريب من مكانها بحيث انها تمر من عندي
يوم جت حسيت بفرحه ما ادري ليه ومرت بجمبي وانا بقمت سعادتي قالت
قود مورننق
بغيت افز من مكاني قلت انا وانا منزل راسي قود مورننق ورفعت ارسي اطالع فيها حسيت فيها ببتسامه وبغيت اطير من الفرحه
وانا ما ادري ليه جلست هي جمبي وتركت مكانها الله اول مره اشم ذاك العطر اول
_مره احس الدنيا غير التفت لها وما قدرت امسك اب_تسامتي ولا فرحتي وهي حست بالشي هذا قالت بصوت خافت هلا قلت هلا فيك
وجلست انا كل العاده اتابع المحاظرات ولا يفوتني كلمه من الدكتور وبعد نهاية
الدراسه قلت لها انا ودي اروح الف في هل الشوراع والاسواق بس ما اعرف وين
اروح ولا اجي بس طريق البيت وطريق السوبر ماركت اعرفه قالت انت وين ساكن طبعا انا وصفت لها البيت وهي تسوي نفسها ما تعرف وقالت يالله بيت جاري انت طبعا تضاهرت اني ما اعرف وطرت فيها ان لها حق الجيره وانها بعيوني الثنتين وحلفتها اذا حتاجت شي انا عندها مشينا للسياره وتوصفلي المطاعم والاسواق وطريق البحر
وانا اسمعها بقلبي
ركبنا السياراه وانا هل المره امشي خلفها وقفنا شوى ويوم جيت انزل مشيت لها
قابلتني وقلت ماشاء الله جيران وتراني زي ماقلتلك انا لك بالي تبين وقلت لها هذا
التليفون اذا بغيتي شي ورحت دخلت البيت وغيرت ملابسي ورحت للمطاعم اللي قالت ابي اغير هل الكبسات وهاالدجاج اللي فقع بطني وادخل على الهمبرغر
زحمه طلبت دجاج وطبعا ما اعرفه من قبل وكان ألذسندوتش اكلته بحياتي وبيبسي وطلعت اول مره على الاخر شبعان ولفيت لي لفه بالسياره وانا اتمنى اشرطتنا العربيه ورحت لبيت ومسكت التليفون واتصلت على ولد جارنا بالسعوديه وطار فيني وانا بعد وفعلا كنت مشتاق لسوالفه وقلت له يطمني عن اهلي واخذت اخبارهم واتفقت معه اني اكلم بكره عليه يكون الوالد موجود اكلمه اسمع صوته طبعا بكيت
على الاهل الوالده بالذات اشتقت ابي صوتها اخواني ابوي البيت غرفتي الطين
بالسطح المزرعه جلست يمكن فترة ربع ساعه
وانا سرحان والدمعه على الخد الا التليفون يدق رفعت السماعه الا صوت العنود انا
تفاجئت وعبرتي كاسره حلقي قالت الو محمد ايش فيك قلت لا ولاشي سلامتك قالت الا فيك شي تعبان قلت المسئله وما فيها كلمت على رفيقي بالسعوديه ولد الجيران في عمله واطمئنيت على الاهل واتفقت معه يجيب ابوي اكلمه بكره وطبعا راح الفكر كله للاهل والوالده والاخوان وخواتي قالت الله يصبرك على الغربه اهم ما عندهم تليفون ضحكت ابي اغير الموضوع وقل انا قلتلك انها ما هي على الخريطه كيف يصير عندهم تليفون ضحكت مجامله وحسيت انا فيها تبي بس تنسيني
قلت احلا رنة تليفون شالتني من الهم وانا العشى علي الليه بسويلك كبسه ولا
تحلمين فيها بحياتك وبجيبها لك لحد بيتك ضحكت وقالت ابشوف الليه اذا ما جاني
تسمم الله يعينني
قلت طيب تشوفين بعد كذا بتقولين ابي وابقولك لا الدولارات اول قالت انا متصله
ابي اخذ دفترك انقل بعظ الحاجات منه قلت انا عيوني اوكي الحين اجيبه قالت يالله
قفلت السماعه ولبست وطلعت انا حسيت انها تقول كذا بس تبي تكلم وطلعت قابلتني
بنصف الطريق واعطيتها الدفتر قلت لها انا طفشان ودي اطلع ادور بالسيارة تبين
اعزمك على شاي في أي مكان قالت لا خليها بعدين انا قلت انت ما وراك شي وانا زيك اذا ما فيها أي ازعاج لك تفضلي ركبت السياره معي وطلعنا على الطريق وقفنا في سوق غير اللي اجيه دايم انا قالت انا اجي هنا اشرب قهوه لاكن هل المره
بشرب شاي عشانك وهي تضحك نزلنا وطلبنا اثنين شاي وجلست أنا وايها وقلت لها العنود ممكن تتكلمين عن اهلك شويه ودي اعرفك اكثر ارتبكت هي من سؤالي ولا حظت عليها الشي هذا وبدت تتكلم تقول انا اكبر وحده لي اخوان صغار
وخوات صغار ابوي عنده شركه كبيرة وهو اللي عرض علي الدراسه هنا وامي حبوبه مره ومتعلمه
طبعا يكلموني شبه يوميا
وانا اكلمهم وابوي يبي يجي الاسبوع الجاي لي زيارة وهو عنده عمل
وطبعا انا امس كلمتهم عنك انا هنا حسيت انه موجاي عمل جاي يبي يشوفني ويشوف
بنته جلست تتكلم عن اهلها عائلتها كلهاويوم خلصت قالت يالله الدور عليك ظحكت
وقلت لها انا دوري بالسياره عشان ما نتأخر
ركبنا السيارة وقلت لها كل شي عني وعن اهلي وقريتي كلها بالتفصيل حسيت البنت
ارتاحت لي بشكل كبير
نزلنا لبيوتنا وقالت وهي تضحك لاتنسى تسممني الليله وهي تضحك قلت طيييييب
طبعا جلست اتففن بالطبخ والبهارات من الوالده الله يطول عمرها وحكرت هذيك
الكبسه ودلعهتا وحطيت لها بسرفيس وغطيته وكلمتها قلت استقبلي الذبيحه وطلعت وهي مستحيه مني وتقول مشكور وانا اردها لك قلت طيب بس بشرط تكون نفس المستوى بالطبخ
ضحكنا وقلت تصبحين على خير وقالت وانت من اهله ويوم قمت بكره لقيتها
بالسياره اشرت لها قلت
قود موررنق
وقالت قود موورنق
وقلت لها تعالي وفري بنزين
تعالي معي بسيارتي محاظراتنا وحده شوى ترردت واستحت وجت عشاني طبعنا انا احلا صباح مر علي هذاك اليوم ورحنا للجامعه سوى وافطرنا سوى وانحاس مصروفي
وميزانيتي بذاك الفطور لاني انا اجمع من الراتب اللي يجيني وابيع واشتري بالسيارت والله وفقني فيها وبعد خمسة ايام الا ابوها يوصل وراحت
تستقبله في المطار
وانا جلست اعد الدقايق عشان اكلم الوالد الله يطول عمره اتصلت رد علي ابوي يوم
قال هلو الا تمسكني العبرة قلت هلا يبه هلا بهالصوت
يا يبه وبعد ما اطمئنيت عليهم قلت يبه تبي شي محتاج شي قاصر عليكم شي تراني بنعمه وعندي خير
يبه ولدك على تربيتك وعلى وصاتك ويرفع راسك بطيبه واخلاقه قال ابشرك وانا ابوك
يبون يركبون لنا تلفون بالديره وانشالله نكلمك على طول وبعدها قفلت السماعه
وعشت بعالم ثاني
قمت وصليت وجلست اراجع الا التليفون يدق الا الشباب سعوديين يقولون نبي نروح
لاس فيقاس
هل الويكند قلت تم معكم وترا المشيه بكره بعدها قفلت الا يدق مره ثانيه
ورفعت السماعه الا العنود قلت هلا قالت ابوي عندي وده يشوفك ويسلم عليك قلت انا لي الشرف اشوفه دقايق وجاي المهم
لبست وطلعت لهم ويوم دقيت الباب الا العنود تفتح وهي وجها احمر من الحيا قالت
تفضل دخلت وسلمت وحبيت راس ابوها بصراحه انا ارتحت يوم شفته جلسنا شربنا شاي
وابوها يسئلني عن كل شي عن اهلي عن حياتي وحياتهم
وعن دراستي انبسط يوم عرف مستواي بالدراسه وحسيت انه ارتاحلي مره على الاخر طبعا حلفت انا عليه اعزمه اذوقه الطبخ الليله قال يا وليدي وش رايك مطعم افضل ضحكت انا قلت ليه خايف من طبخي لاتخاف
اجل وشرايك في برابكيو
يا عم واتفقنا انا استئذنت وطلعت ورحت شريت كل شي وجا اليل وبعد الساعه 8 جو عندي بالحديقه الجو كان رائع جدا جلسنا وسولفنا عن كل شي كان يتكلم عن تجارته وعن العمل بالسعوديه
والطفره الحاصله هناك وبعد ما تعشينا قال تعال ابيك شوي وانتي العنود روحي سوي شاي لنا انا حسيت انه بيقول شي جلست انا واياه وقال ياوليدي انت تقدر تحمل الامانه قلت ايش هي واذا اقدر اقولك قال العنود
تقدر تحمل امانتها قلت يا عم بدون ما تأمني عليها انا اصلا وحلفت له بالله انها امانه في عيوني لين ارجع للسعوديه طبعا هو اخذ كلامي وارتاح لما سمعه قال الحين انا اطمئنيت عليها تراها امانه عندك بسألك عنها عند رب العالمين وجت
العنود وجلسنا بس بصراحه والله جلسه ممتازه ومن بكره سافرت مع الشباب
لاس فيقاس وكانت فعلا رحله ولا اروع منها طبعا طلاب اكيد طفارا
(يعني ما فيه فلوس زايده)
المهم اتفقنا كل اثنين في غرفه وطبعا لاس فيقاس ام القمار بس والله روعه جلسنا
يومين ورجعنا كنها دقيقه من الوناسه الي شفناها يوم رجعت ومن بكره طلعت للجامعه ورجعت الا ابو العنود يجي عندي يقول يبي يسلم يودعني قلت له انا اوصلك المطار طلعنا أنا والعنود وهو ورحنا للمطار ودعناه يوم رجعنا آنا أسوق سيارة العنود
بدت دنياي الجديدة
مشينا بالسيارة وطلعنا من المطار انا حسيت بالعنود مره متضايقه بعد سفر ابوها
ما تبيني اشوف عبرتها
اناقلت لها كانك تعبانه نزلي الكرسي على الاخر وغمظي عيونك وحاولي ترتاحين على
طول ومن غير تفكير نزلت الظهر حق الكرسي وغمضت عيونها وشفت دمعه على الرمش
وضاقت بي الدنيا صرت اسوق السيارة ولا اسرعت بعد ثلث ساعه تقريبا قامت وعدلت
الجلسه وحاولت تضحك وانا تجاوبت معها قالت محمد والله غصب عني ودي اني رجعت
معاه قلت امانه العنود لاتنقضين جروحي خليني احاول العب على نفسي بالنسيان
قالت ايش رايك نروح البحيرة ونمشي على رجولنا انا والله فعلا مالي خلق اروح
البيت قلت طيب على ما تحبين بس وشرايك قبل نروح اعبي الترمز شاي وقهوه عربيه
وناخذ مويه واغير ملابسي قالت الا افضل بعد انا بغير ملابسي وصلنا وجهزنا كل شي وانا احس بفرحه بشي غريب وهي اقرا في وجهها نفس الشي وصلنل البحيره وجلسنا نتكلم نسولف عن السعوديه واكلمها عن قريتنا كيف الناس وطيبتهم وان القريه كلها
14 عائله وانا كئنا بيت واحد نحب بعض نخاف على بعض وبعد ما ارتحنا قلت لها إيش
رايك نمشي على البحيره شويه وبدون ما ترد الا هي تاقف وتقول يالله تركنا
اغراضنا ومشينا يمكن خمس دقايق وبدون شعور مسكت يدها وهي استسلمت لي بدون شعور
حسيت بلمست يدها ونسيت العالم كله ومشينا كثير ما حسينا بالوقت
وبعد شويه حسيت انها تسحب يدي وجهها احمر من الخجل وانا انتبهت لنفسي وبدون
شعور قلت لها والله العظيم ما ادري كيف سمحت لنفسي امسك يدك هي من طريقة كلامي واحساسها اني صادق ضحكت ضحكه قويه وانا مثلها انتبه وضحكت بدون شعور طحت على ركبي وهي من دون شعور جلست على ركبها قدامي وشفت بعيني اطهر وجه واطهر برائه
فيه وهي سكتت فجئه زيي وفجئه قامت وقالت محمد يالله بروح ورجعنا وكل واحد يمشي وهو سرحان حاولت اقطع هالصمت قلت الله بكره جامعه ويالله ردت قالت الله يعين قلت باقي على اجازة راس السنه والكريسمس تقريبا عشرة ايام قالت لك حادث حديث وفعلا حسيت انا تبي تروح بسرعه ما تبي تكلم انا احترمت رغبتها اللي ما صرحت لي فيها ركبنا السيارة ورجعنا لبيوتنا ونزلت اغراضي وهي نزلت واعطيتها مفتاحها
وقلت اشوفك على خير قالت باي ومشيت لبيتي وانا ضايق صدري حسيت بشي غريب ولا
عرفت ارتاح ولا شي جلست افكر ايش سويت انا معقول سويت شي غلط ضايقها انا فعلا البنت هذي قدرت تسيطر عل احساسي وتفكيري استولت على جزء كبير منه صليت ولا لي
نفس على الاكل فكرت اتصل عليها اروح لها ابي اعرف شي ابي اعرف ليه اتغيرت فجئه قلت لا اخاف اضايقها ورحت انام ولا عرفت انام جلست لين طلع النور وانا افكر ليه وايش سويت ودارت الدنيا فيني المهم طلعت الصبح استنيت تجي تطلع ما طلعت ورحت
للجامعه قلت يمكن انها راحت بدون السيارة واول ما دخلت القاعه راحت عيني
لمكانها وانجنيت بزود ما جت ليه واستنيت المحاظره الثانيه الثالثه ماجت انا
خلاص انهرت ابي اعرف السبب طلعت ما كملت محاظراتي ورحت للبيت وسيارتها موجوده
ما تحركت دخلت ما نمت ولا ارتحت واعصابي مره خلاص استلقيت على ظهري ومن زود
التعب ما دريت عن نفسي الا انا اصحى الساعه 3 الفجر وجوعان قمت اكلت بنفس مسدوده وشربت شاي
ورجعت لوضعي الاول مشدوده اعصابي قلت اكلمها وانا متردد قلت خلها بكره عجزت استنى ما قدرت وبدون ما احس لقيت نفسي اتصل عليها واول دقه الا هي ترد قلت العنود قالت هلا انا سمعت صوتها حسيت شي
مو صوتها اللي اعرفه قلت العنود ايش فيك سلامات قالت ولا شي حلفتها قالت لا تحلفني ما فيني شي قلت بس بسئلك سؤال
ممكن قالت مو وقته قلت لا الا ابي اسئل بس سؤال واحد ولا اعطيتهافرصه تجاوب قلت
العنود