كَتُوم ياقلبي..

كَتُوم ياقلبي..
والهَوى مَليان هُمُومْ
مَهْما بتقاسي... تَخبِّي
مَ أنْتَ ياقلبي حَنونْ.

ياما قولتَ لَكْ..
تروحْ لُه..
تَشْكي مَنُه
وانْتَ دَقَّاتكْ تَقولْ: ..
إنْ شكيتْ مَرَّه لقلبُه
قلبي انا يَبقى العَزولْ
و العَذاب اللي باشوفُه
مَ الحبيبْ عندي يَهونْ.

قولتَ لَكْ: ...
في سَماكْ سَحَاب بَيَرْعَدْ
والنَّهار مَليان غُيومْ
والليالي صَعْبه..
مُرَّه
تاه قَمرها..
والنُّجومْ
والسُّهاد مالوشْ نهايه..
كُل لحظه تَعَدِّي يُومْ.

وامَّا طالْ بينَّا الكَّلامْ
عقلي قالْ:..
" والله حَرامْ "
ساعتها فاض بِي..
وقولتَ ابوحْ
لجل مَ ازيح الجُّروحْ
روحت أحكي للطيورْ
وقبل مَ انهي لها الحكايه
كُلَّها هَتفتْ معايا..
إنْ صَبرتْ وقُلتْ تَقْدَرْ
مَ العذابْ كاسات حَ تَشربْ
والمرارْ حَ يطول وتسهرْ
تَبكي عُمرَكْ مَ اللي نابكْ
مَ انتَ تستاهل عذابكْ
مَ انتَ تستاهلْ وأكترْ.

بَسْ قولي وانتَ قلبي..
مين حَ يرضى أنُّه يَقسى..
وانتَ تنسى
بَسْ قولي وفُكْ أسري..
مين حَ يَسْمح أنُّه يَجْرَحْ..
وانتَ تَصْفَحْ
قولْ ياقلبي..
ليه أعيشْ من غير سعاده...!!..
والهَوان ألقاه زياده...!!.
بقلم الكاتب /الشاعرعبدالحميدالباجوري

بوركت يمناك على روائعك

الأستاذه المديره
أشكر لك إهتمامك بالمرور ..
وكلماتك الرقيقه في ردك اللطيف.

العفو اخي الفاضل

مشكور اخي الكريم

كلمات رائعة وطرح راقي